Suliagut

UNICEF-imi suliat

UNICEF nunarsuarmi tamarmi nunatsinnilu meeqqat inuusuttullu inuunerannik pitsaanerulersitsiniarluni suliniuteqartarpoq. Meeqqat inuunerinik annaassisarpugut, illersuisarpugut nukittorsaasarlutalu. Ilaatigut ikiuiniarneq ingerlattarparput, siunissami ungasinnerusumi sunniuteqartussanik suliniuteqarnerit meeqqallu pisinnaatitaaffiisa nunarsuarmi tamarmi ataqqineqarnissaat illersorneqarnissaallu suliniutigisarlugit.

UNICEF meeqqat pisinnaatitaaffiinik sorsuuteqarpoq

UNICEF meeqqat pisinnaatitaaffii pillugit, Naalagaaffiit Peqatigiit isumaqatigiissutaat, meeqqat tunngaviusumik pisinnaatitaaffiinik qulakkeerinninnissamut tunngassuteqartoq aallaavigalugu, suliniuteqartuuvoq. Ineqarnermut, toqqissisimanermut isumassorneqarnermullu tunngaannarani inuttut pisinnaatitaaffilittut pineqarnissamut tunngassuteqarportaaq. Tamanna nunatsinni sulinitsinni nunarsuullu sinnerani atuuppoq.

Naalagaaffiit Peqatigiit – nunarsuullu sinnerani meeqqat pillugit suliniaqatigiiffiit annersaattut, meeqqat pisinnaatitaaffii pillugit isumaqatigiissutip eqquutsinneqarnissaanik sorsuutiginninnissaq UNICEF-ip suliassaraa. Tamatigut meeqqanik illersuisarpugut meeqqallu tusaaneqarnissaannik qulakkeerinninniartarluta. Paasissutissanik kisitsisinillu katersisarpugut nunarsuarlu tamakkerlu meeqqat atugarissaarnissaat nakkutigalugu. Partiilersuunnernut akuliuttanngilagut illersuisaratalu, meeqqallu pisinnaatitaaffii innarlerneqaraangata isumarput nipituumik annittarlugu.

Meeqqat pisinnaatitaaffii pillugit isumaqatigiissut UNICEF-ip sulinerani toqqammaviuvoq pingaarutilik, pisinnaatitaaffiillu inuiaassuseq, suiaassuseq, inuttut atukkat, upperisaq kulturilu apeqqutaatinnagit meeqqanut TAMANUT atuupput.

Naalagaaffiit Peqatigiit Meeqqanut Isumaqatigiissutaat
UNICEF annertunerusumik paasisaqarfigiuk

UNICEF-ip nunatsinni suliai

UNICEF 2011-miilli nunatsinni sulilerpoq. Namminersorlutik Oqartussat qanimut suleqatigalugit ukioq taanna UNICEF-ip NAKUUSA pilersippaa. Naalagaaffiit Peqatigiit meeqqat pisinnaatitaaffii pillugit isumaqatigiissutaannut toqqammaviusut naleqartitallu ilisimaneqarnerisa annertusarnissaat taamaaliornikkullu eqquutsinneqarnissaannut tunngaviusup nukittorsarnissaa siunertat pingaarnersaraat.

Nunatsinni UNICEF-ip allaffiani meeqqat pisinnaatitaaffii, meeqqatut pitsaanerusumik inuuneqarnissaq, meeqqat inersimasullu akornanni Naalagaaffiit Peqatigiit meeqqat pisinnaatitaaffii pillugit isumaqatigiissutaannik meeqqanullu isiginnittariaatsimik ilisimasaqarnerunissaq qitiutillugit suliniuteqartuarnissaq qulakkeerniarsarisarparput.

Kalaallit Nunaanni suliniutit

UNICEF-ip nunarsuarmi suliai

Sorsunnerni ajunaarnersuarnilu ikiuiniartarneq UNICEF-ip suliaani pingaarnerpaat ilaanniippoq. Ukiut tamaasa meeqqat millionilikkaat inuunerannik annaasseqataasarpugut sulilu amerlanerusut periarfissaannik pitsaanerulersitsisarluta. Nunani nunallu ilaani 190-ini suligatta ajunaarnersuaqartillugu ikiuiniarnerni siulliulluta takkuteqqaarajuttarpugut. Nunanilu meeqqat ikiorneqarnissamik pisariaqartitsinerpaaffiini annertuumik peqataasarluta.

Siunissaq ungasissoq isigalugu, nunarsuarmi nunani piitsuunerpaani inerisaanermi iliuuseqartartut annerpaat ilagaatigut. Aalajangersimasumik aningaasaliisartut suleqatigisartakkallu qujanaqisut ajunaarnersuit sioqqullugit, taakku nalaanni kingornalu ikiuussinnaanngortippaatigut.

Ilisimatusarneq nutaaliornerlu atorlugit nunarsuarmi meeqqanut TAMANUT siumukarnermik pilersitsisarpugut ataavartumillu pitsannguuteqartitsisarluta.

unicef.dk-mi paasisaqarnerugit

Meeqqat pisinnaatitaaffiisa innarlerneranerat akuerinngisaannassavar-put. Meeqqat pillugit sorsussaagut politikkimilu arlaannaannulluunniit attuumassuteqarata – meeqqalli pisinnaatitaaffiisa innarligaaneranni nipangiinnanngisaannassalluta.

  • UNICEF