UNICEF-ip

nunatsinni suliai

Nunatsinni suliniutivut

2011-mi UNICEF Naalakkersuisullu nunatsinni meeqqat pisinnaatitaaffii siuarsarniarlugit annertuumik suliniuteqarnissamut tunngavissiisumik suleqatigiinnissamut isumaqatigiissusiorput. Taamanili Naalagaaffiit Peqatigiit meeqqat pisinnaatitaaffii pillugit isumaqatigiissutaasa najukkani ilisimaneqarnerulernissaa, tamatumanilu toqqammaviusut atuutilersinneqarnissaat/piviusunngortinneqarnissaat siunnerfigalugit UNICEF suliniuteqarpoq.

Meeqqatut inuunerissuuneq 

Kalaallit Nunaanni allaffitsinni suliniutit ataavartut, meeqqat pisinnaatitaaffiinik qitiutitsisut, meeqqat inuuniarnerminni atugarisaannik pitsanngorsaaneq kiisalu Naalagaaffiit Peqatigiit meeqqat pisinnaatitaaffii pillugit isumaqatigiissutaasa, inersimasut meeqqallu akornanni ilisimaneqarneranik annertusaanissaq suliniutigaagut.

2019-imi allaffiup pilersinneqarneraniit, kalaallit meeqqat atuarfianni atuartut akornanni meeqqat pisinnaatitaaffiisa ilisimaneqarnerat malunnaatilimmik annertusivoq.

Inuiaqatigiit meerartaasa tamakkerlutik inuunerissaarnissaat piginnaasaasalu tamakkerlugit atorsinnaanissaannut periarfissinnissaat anguniarparput.

Ataqatigiilluta nukittuunik

NAKUUSA

Meeqqat pisinnaatitaaffii pillugit artikelit eqquutsissinnaanerunissaannut inuiaqatigiit piareersarniarlugit paasissutissiinerit ilinniartitsinerillu NAKUUSA-p UNICEF Danmarkip Naalakkersuisullu suleqatigiissutigaat. Nunatsinni meeqqat peqataatinneqarnissaannik qulakkeerinninnissaq NAKUUSA-p immikkut suliniutigaa.

Suliniutit – soorlu Meeqqat Isummersorfii, meeqqat ataatsimeersuartarneri, Nakuusaaqqat ilinniartitsisullu isumasioqatigiittarneri aqqutigalugit nunatsinni meeqqat peqataatinnerunissaat NAKUUSA-p suliniutigaa.

NUKUUSA annertunerusumik paasisassarsiorfigiuk

Suliniutit allat

Meeqqat pisinnaatitaaffii suliniutigaagut. Meeqqat sumiiffigisaanni tamani taamaaliortarpugut. Meeqqat oqariartuutaasa tusaaneqarnissaannut ataqqineqarnissaannullu aalajangiinernilu meeqqat inuunerannut tunngassuteqartuni peqataatinneqarnissaannik ikorfartuillutalu illersuivugut.

Ataatsimoorluni aalaneq

Kalaallit Nunaanni Timersoqatigiit Kattuffiata UNICEF-illu Kalaallit Nunaanni allaffeqarfia, 2021-mi Paarisamik, KNI-mik, Politiinik kiisalu nunatsinni Innuttaasut Peqqissusiannik ilisimatusarfimmik suleqateqalerpoq. Inersimasut toqqissisitsisut peqatigalugit meeqqanut timersoqatigiinnernik pitsaasunik peqataatitsisunillu pilersitsinissaq anguniagaavoq. Tamatuma saniatigut nunarsuarmi timimik aalatitsinerpaanut ilaanissaq anguniagaallunissaaq.

Sermitsiami allaaserisaq atuaruk

Eqqaamallugu! Paasititsiniaaneq

Paasititsiniaaneq una meeqqat timersornerminni toqqissisimanissaannik ukkassivoq. Tassani pingaaruteqartutut ilaavoq sungiusaasut namminerlu kajumissutsimik sulisut atorfinitsinnginnerini pinerlussimannginnermut uppernarsaammik tunniussisimanissaat. Akisussaassuseqarnissamik meeqqanillu sullissisut tamarmik pisarialinnik uppernarsaateqarnissaannik isumaginninnissamik, paasititsiniaaneq ersarissumik oqariartuuteqarpoq.

Ataatsimoorluta aalasami video takuuk

Parisimi isumaqatigiissut

”Parisimi isumaqatigiissummik akuersineq alloriarneruvoq pingaarutilik – taannali aallarniutaannaavoq. Suleqatigiinneq ingerlatiinnassavarput, immitsinnut tusarnaassaagut, tamatsinnut siunissaq piujuartitsiviusoq isumannaatsorlu qulakkeerniarlugu iliuuseqarluta.” Taama oqarpoq 14-inik ukiulik Niklas, NAKUUSA-p Meeqqat Isummersorfiini ilaasortaq.

Annertunerusunik paasisassarsiorit