NAKUUSA-p meeqqanut
ataatsimeersuartitsinera
Meeqqat ataatsimeersuarnerat
NAKUUSA ukiut tamaasa meeqqanik ataatsimeersuartitsisarpoq, tassanilu Meeqqat Isummersorfiini nuna tamakkerlugu ilaasortat illoqarfimmi ataatsimi naapillutik oqaloqatigiillutillu isummersortarput. Sammineqartussaq Naalagaaffiit Peqatigiit Meeqqat pillugit isumaqatigiissutaannit aallaaveqartoq Meeqqat Isummersorfiinit aalajangerneqartarpoq.
Meeqqat soqutigisaat tunngavigalugit ataatsimeersuarneq
Meeqqat Isummersorfiini ilaasortat kommunit tamarmik tallimanik peqataatitaqarfigisaat ataatsimeersuarnermut peqataasinnaapput, taamaalilluni kommunit tamarmik sinniisoqarfiunissaat qulakkeerneqartarluni.
Meeqqat ataatsimeersuarnerini sammineqartussaq Naalagaaffiit Peqatigiit Meeqqat pillugit isumaqatigiissutaannit aallaaveqartoq Meeqqat Isummersorfiinit aalajangerneqartarpoq. Taamaasilluni ataatsimeersuarneq meeqqat soqutigisaannik tunngaveqartinneqarluni aaqqissuunneqartarpoq. Tamatuma saniatigut Qaanaami Tasiilamilu meeqqat tallimat ataatsimeeqataasinnaapput. Meeqqat Isummersorfii taamaalillutik nuna tamakkerlugu meeqqat inuusuttullu sinnerlugit oqaaseqartartuupput.
2011-mi meeqqat ataatsimeersuaqqaarneraniilli meeqqat isummersinnaasimapput sammisallu taakkununnga pingaaruteqartut pillugit pingaarutilinnik aalajangiisoqartillugu peqataasinnaasarlutik. Tamanna meeqqat inuusuttullu Kalaallit Nunaanniittut oqaaseqarsinnaalernissaannut iluaqutaavoq.
Meeqqat Ataatsimeersuarnerat 2026
Ukioq manna Nuummi Meeqqat Ataatsimeersuarneranni meeqqat inuusuttullu 25-it Kalaallit Nunaat tamakkerlugu najugallit ataatsimooriartorsimapput. Meeqqat Isummersorfii aqqutigalugit kommune-t tamarmik aallartitaqarsimapput. Ukiumut sammisaq tassaavoq: ”Iliuuseqarneq meeqqanut inuusuttunullu iluaqutaasussaq”. Ilaasut workshopernerminni tapersersoqatigiissimapput, killilersuillutik ataatsimoorfiusunilu akisussaaffimmik tigusillutik. Namminneq misilittakkaminnik avitseqatigiissimapput, ulluinnarni unamminartitatik pillugit oqaloqatigiissimallutik aamma oqariartuutiminnik ineriartortitsisimallutik. Pilersaarusiaq malillugu politikkerinik aalajangiisartunillu ataatsimeeqateqarsimapput, oqaloqateqarsimapput sammisaqaqatigisimallugillu.
Aalajangersakkanik tunniussineq
Meeqqat Isummersorfiini ilaasortat meeqqat ataatsimeersuarnerini Naalakkersuisunut borgmesterinullu inassutinik arlalinnik allattuisarput. Inassutit tunngavigalugit aalajangersagaq NAKUUSA-p suliarisarpaa, taannalu immikkut malunnartitsiutigaluni Naalakkersuisunut borgmesterinullu tunniunneqartarpoq. Tassani Meeqqat Isummersorfiini ilaasortat, Naalakkersuisut kommunillu aalajangersagaq atsiortarpaat, taamaalillutik inassuteqaatit malinnissaannut pisussaaffeqalersarput.
Meeqqat ataatsimeersuarnerisa kingorna inassuteqaatit malinneqarnissaat NAKUUSA-p qulakkeertarpaa. Aalajangersakkat inassuteqaatillu aamma najukkami kommunini qinikkat ataatsimiinnerini saqqummiunneqartarput, tassani Meeqqat Isummersorfiini ilaasortat attaveqaatertik peqatigalugu peqataasarlutik. Taamaalilluni meeqqat nipaasa tusarneqarnissaat qulakkeerneqartarpoq – najukkami nunamilu tamarmi.
NAKUUSA-p meeqqanik ataatsimeersuartitsisarnerata siunertarisarpaa Kalaallit Nunaanni meeqqat inuusuttullu isummersinnaanissaasa isumaasalu Naalakkersuisunut kommuninullu saqqummiunneqartarnissaasa piviusunngortinneqartarnissaat.
