Meeqqat Naalakkersuisunut Aalajangersakkat tunniuppaat
Iliuuseqarsinnaassuseq, meeqqanik aamma inuusuttunik siuarsaasuusoq
Maajip 21-iani meeqqat nuna tamaat sinnerlugu aggersimasut ukiormanna Aalajangersakkat Naalakkersuisunut borgmesterinullu tunniutissavaat, tamanna pissaaq pisortatigut aaqqissuussami Hans Egede-p Illuani. Aalajangersakkat ukioq manna Meeqqat Ataatsimeersuarnerani meeqqat suliaasa inernerivaat, taakkunanilu ukkatarineqartoq tassaavoq ” Iliuuseqarsinnaassuseq, meeqqanik aamma inuusuttunik siuarsaasuusoq”.
Aalajangersakkat meeqqaniit Meeqqat Isummersorfii arfineq marluusut aqqutigalugit suliarineqarsimapput, taassumalu aalajangiisartut meeqqat atugarissaarnerisa qaffassarnissaannut, ilaatinneqarnissaannut aamma inoqarfinni meeqqat pisinnaatitaaffiisa atuutsinneqarnerisa nukittorsarneqarnissaannut oqariartuutit ersarissut imarai.
Aalajangersakkat tunniunneqarneranut atatillugu eqqumiitsuliortup Pernille Kreutzmann- Larsen-ip Meeqqat Aalajangersagaat tunngavigalugit isumassarsiorluni eqqumiitsuliamik pinngortitsisimavoq. Eqqumiitsuliap meeqqat oqariartuutaat paasinnittariaasiallu takusassianngortippai taamaammallu inuiaqatigiinni nipaat aamma tunniusimanerat ilisarnaaserlugu.
Meeqqat aaqqissuussami Naalakkersuisuni ilaasortanut aamma nunami borgmester-inut oqariartuutitik saqqummiutissavaat. Aaqqissuussami pingaaruteqarluinnartumik pisoqassaaq, tassami aalajangiisartunut meeqqat nipertik tusartissammassuk, taamaalillutik meeqqanut inuusuttunullu tigussaasumik, pitsaasumik siuariaataasussamillu tunniusimallutik aalajangiisartut tigusaqarnissaminnut periarfissinneqassammata.
Meeqqat inuusuttullu ulluinnarni atukkaminnik pitsanngorsaatissanik ersarissunik tigussaasunillu siunnersuutissaqarput. Aalajangersakkat tunngavigalugit aalajangiisartut oqaatsit piviusunngortinnissaannut periarfissinneqarput, taamaalillutik meeqqanut inuusuttunullu siuariartortitsisinnaalissallutik.
Aalajangersakkat meeqqat aalajangiisartullu akornanni oqaloqatigiinnerannut aamma politikkikkut aalajangikkani meeqqat nipaasa ilaatinneqarnissaannut pingaarutilimmik imaqarput. Saniatigullu Aalajangersakkat sammisat aalajangersimasut meeqqat inuusuttullu iliuuseqarfigeqqusaat ersarissumik takutippai aamma sumi akisussaaffeqatigiilluni tigussaasumillu iliuuseqartoqarsinnaanera takutillugu.
