NAKUUSA
NAKUUSA pillugu
NAKUUSA pilersinneqarpoq UNICEF Danmarkip Naalakkersuisullu suleqatigiinnerisigut, taassumallu suliassaraa kalaallit meeqqat pisinnaatitaaffiisa illersorneqarnissaat siuarsarnissaallu. Meeqqat peqataatinnerisigut meeqqat pisinnaatitaaffiisa nukittorsarnissaat meeqqallu tamarmik toqqissisimallutik piginnaaneqarluarlutik peroriartorfigisinnaasaannik inuiaqatigiinnik pilersitsinissaq pingaartitaraarput.
Nunatsinni meeqqat inersimasullu meeqqat pisinnaatitaaffiinik ilisimasaqarnerulernissaat, inuiaqatigiillu naapertuilluartut meeqqanullu naleqquttut pilersinnissaat anguniagaraarput. Suliniutit assigiinngitsut aqqutigalugit meeqqat pisinnaatitaaffiinik eqqumaffiginnilersitsisarpugut meeqqallu nipaasa tusaaneqarnissaat pisariaqartitaasalu matussuserneqarnissaat anguniarlugu siuarsaaqataasarluta.
NAKUUSA isumaqarpoq “ataatsimoorluta nukittuneruvugut” — takorluukkatsinnullu taanna tunngaviuvoq.
NAKUUSA sunaava?
Meeqqat peqataatinnissaat pingaartillugu
Meeqqat inuusuttullu nipaannik – aamma politikkikkut oqaluuserineqartussani – paasissutissiinikkut, ilinniartitsinikkut najukkamilu tunngaviliinikkut peqataatitsisoqarsinnaasoq NAKUUSA-p upperaa. Taamaattumik meeqqanik peqataatitsinissaq pingaartillugu NAKUUSA assigiinngitsunik suliniuteqartarpoq.
Suliniutit tamarmik paasissutissiinermik ilinniartitsinermillu tunngaveqartarput, inuiaqatigiit tamarmik meeqqat pillugit isumaqatigiissummik eqquutsitsilluarsinnaaneruniassammata. Ilaatigut Nunarput tamakkerlugu meeqqat siunnersuisoqatigiivinut – Meeqqat Isummersorfiannik taaneqartartumut – sulisussarsiornikkut, aamma Nakuusaaqqanut ilinniartitsisunut, tassa atuarfinni pisinnaatitaaffiit pillugit siunnersuisoqatigiinnut, suliatigut siunnersuinermik attaveqaateqarnermillu neqerooruteqarnikkut tamanna timitalersortarparput.
Taamaalilluta meeqqat inuiaqatigiinni oqaaseqarsinnaanerulernissaannik pisinnaatitaaffiisalu ataqqineqarnissaannik illersorneqarnissaannillu qulakkeerinninniarpugut.
Nakuusaaqqat
Meeqqat Isummersorfii
Meeqqat Isummersorfii NAKUUSA-p suliniutaasa ilagaat meeqqat peqataatinneqarnerulersinnissaannut tunngasoq. NAKUUSA Meeqqat Isummersorfiinik arfineq-marlunnik ingerlatsivoq: Avanersuarmi, Avannaani, Qeqertalimmi, Qeqqatami, Sermersuumi, Kangiani Kujallermilu.
Meeqqat inuiaqatigiinni oqaaseqarsinnaanerulernissaannut aamma isumaasa pisariaqartitaasalu tusaaniarneqartarnissaannut ataqqineqartarnissaannullu Kalaallit Nunaata suliniuteqarneranut ilaasortat pingaaruteqarput.
Meeqqat pisinnaatitaaffii
Naalagaaffiit Peqatigiit meeqqat pillugit Isumaqatigiissutaat
NAKUUSA-p suliniutai tamarmik Naalagaaffiit Peqatigiit meeqqat pillugit Isumaqatigiissutaanik tunngaveqarput.
Meeqqat pillugit isumaqatigiissut nunarsuarmi tamarmi meeqqanut 18-it inorlugit ukiulinnut tamanut atuuppoq, meeqqallu meeraanerminni inersimasunngornerminnilu pitsaanerpaamik inuunissaannik qulakkeerinninnissaq pillugu pilersitaalluni.
Meeqqat pillugit isumaqatigiissut 54-inik immikkoortortaqarpoq, tassanilu meeqqat tunngaviusumik pisinnaatitaaffii, ineriartorsinnaatitaaffii, illersorneqarsinnaatitaaffii aalajangiisinnaatitaaffiilu pillugit – kiisalu naalakkersuisut, kattuffiit, peqatigiiffiit allallu isumaqatigiissummik malinninnissamut akisussaaffii pillugit siunnersuuteqarluni.
