UNICEF-ip anguniagai

  • UNICEF Naalagaaffiit Peqatigiit ataatsimeersuarneranni meeqqat pisinnaatitaaffiinik oqaluuserinninnissamut, meeqqat pisariaqartitaannik tunngaviusunik isumaginninnissamut meeqqallu ineriartornissaannut ikiuinissamut piginnaanerisalu tamakkiisumik atorneqarnissaasa tapersersornissannut piginnaatinneqarpoq.
  • UNICEF-ip Meeqqat Pisinnaatitaaffii pillugit Isumaqatigiissummi meeqqat qanoq pineqartarneranni ileqqussatigut najoqqutassiatut nunanilu tamalaani najoqqutassiatut atuutsitsinissaq sulissutigisarpaa.
  • UNICEF-ip meeqqat aniguinissaat, illersorneqarnissaat ineriartornissaallu silarsuup ineriartornissaanut siuariartornissaanullu aalajangiisuusut aalajangiusimavaa.
  • UNICEF-ip politikkikkut piumassuseq aningaasallu katersortarpai, taamaalillutik nunat — pingaaartumik nunat suli ineriartortitassat — meeqqat illersorneqarnissaat pillugu annertunerusumik sulisinnaanissammata. Politikkikkut sulinermi aammalu meeqqanut ilaqutaannullu pisariaqartumik ikiuinermi.
  • UNICEF-ip meeqqat atugarliortut: meeqqat sorsunnernit, ajunaarnersuarnit, piitsuunermit, nakuusernermit atornerluinermillu eqqugaasut meeqqallu innarluutillit pingaartittuaannarpai.
  • Ajornartoorfinni UNICEF ikiuuttarpoq, meeqqat illersorneqarniassammata. UNICEF immikkut piginnaasaqarpoq sukkasuumik iliuuseqartarluni – Naalagaaffiit Peqatigiit sinneri peqatigiiffiillu allat inunnik ikiuiniartut suleqatigalugit meeqqat ilaqutaallu sorsunnermi ajunaarnersuarmiluunniit annaanniartarlugit.
  • UNICEF politikkimut attuumassuteqarnanilu immikkoortitsinngilaq, meeqqallu atugarliortut nunanilu pisariaqartitsiffiunerusuniittut pingaartinnerujuaannarpai.
  • UNICEF-ip niviarsiaqqat arnallu naligiimmik pisinnaatitaaffeqarnerat nittarsaattarpaa, taamaalillutik inuiaqatigiinni politikkikkut, inooqatigiinnikkut aningaasaqarnikkullu ineriartornermut naligineqarlutik peqataasinnaaniassammata.
  • UNICEF-ip nunarsuaq tamakkerlugu piujuartitsinermi ineriartorneq Naalagaaffiit Peqatigiillu eqqissinermik inuiaqatigiinnilu siuariartornermik takorluugai piviusunngortinniarlugit suliniuteqarpoq.