UNICEF silarsuarmi meeqqanut suliniaqatigiiffiit annersaraat
UNICEF tassaavoq Naalagaaffiit Peqatigiit meeqqanut suliniaqatigiiffia, suliassarpullu pingaarnerpaaq tassaavoq meeqqat atugaannik ataavartumik allannguinissaq pisinnaatitaaffiinillu illersuinissaq. Meeqqanut suliniaqatigiiffiit annersaattut – Naalagaaffiit Peqatigiinnilu akuusartutut – nunat 190-it sinnerlugit immikkut ittunik sunniuteqarluartarpugut.
UNICEF nunarsuarmi suliniaqatigiiffiuvoq meeqqat amerlanerpaat inuuinnarnissaannik inuunermilu ingerlalluarnissaannik ikiuisoq. Meeqqammi tamarmik assigiimmik pisinnaatitaaffeqarput. Tamanna pissusissamisuuginnartussaagaluartoq ajoraluartumik taamaanngilaq. Piffissami inuuffigisatsinni meeqqat pisinnaatitaaffiisalu illersorneqarnissaat amerlasuutigut unammilligassanik nalaataqarfiusarpoq.
Meeqqat amerlavallaarujussuartut sorsuffiusuni taakkualu sunniutigisartagaanik nalaataqartarput. Meeqqat amerlavallaarujussuartut silaannaap kissatsikkiortornerata nassatarisaanik atugarliuuteqartarput. Meeqqat amerlavallaarujussuartut naammattunik nerisassaqartinneqarneq ajorput imaluunniit naleqquttunik nerisaqartinneqassanatik, akiuussuserneqartaratik atuarnermilluunniit ilikkartinneqassanatik.
Inersimasullu aalajangiilertigatik meeqqanik isumasiueqqaarneq ajorput, uffa meeqqat aamma aalajangikkani sunnigaasussaasut. UNICEF-imi sulissutigiuarparput siunissami aalajangiinerit iliuuseqarnerillu meeqqanut sunniisussat pillugit meeqqat akuutinneqarlutillu peqataatinneqartarnissaat. Sulissutigaarput siunissami aningaasaliisarnerit meeqqat atugaat eqqarsaatigalugit ingerlanneqartalernissaat. Sulissutigaarputtaaq siunissami meeqqat pisinnaatitaaffiisa eqquutsinneqarlutillu saqqumilaartinneqartarnissaat illersorneqartuarnissaallu. UNICEF-imi upperaarput meeqqat, inuusuttut inersimasullu ataatsimoorlutik nunarsuarmik eqqissisimanerusumik toqqissisimanarnerusumillu pilersitseqatigiissinnaasut. Meeqqat tamarmik pisinnaatitaaffeqarput eqquutsinneqartariaqartunik. Eqquutsinneqarnissaasalu tungaannut uniinnarnavianngilagut. Meeqqat atugarissaarlutik siunissagissaarlutillu inuusinnaanissaannut peqatigiilluta iliuuseqaqatigiitta.
Naalagaaffiit Peqatigiit Meeqqat pillugit Isumaqatigiissutaat suliatsinnut tamanut tunngaviuvoq.
Silarsuup siunissaanut neriugisat kinguaariinnut tulliuttunut isumalluutigineqarput.
