Sineriak tamakkerlugu meeqqat peqqinnartunik
ullumi igaqatigiissapput
Illoqarfinni qulaaluani nunaqarfinnilu 14-ini atuarfinni 27-ni atuartut 467-it, ullumikkut peqqinnartunik igaqatigiipput. Tamatuma peqatigisaanik meeqqat pisinnaatitaaffii pillugit isumaqatigiissut meeqqallu pisinnaatitaaffii ilinniarpaat.
Ullumikkut atuartut nuna tamakkerlugu IGASA-mi peqataapput. Meeqqat nuna tamakkerlugu peqqinnartunik nerisassioqatigiinneranni, tamatumalu peqatigisaanik meeqqat pisinnaatitaffii pillugit isumaqatigiissummik meeqqaallu pisinnaatitaaffiinik ilinniartinneqarneranni, Paarisa UNICEF-illu Kalaallit Nunaanni allaffeqarfia aaqqissuisuupput.
”Nerisassioqatigiinnikkut meeqqat nuannersumik pitsaasumillu misigisaqartikkusuppagut angerlarsimaffimminni peqqinnartunik nerisassioqataanissaannut kajungilersinnissaat neriuutigalugu,” Helena Lynge Møller Paarisami immikkoortortami pisortaq nassuiaavoq.
Ukioq manna pisarnertut Brugseni, KNI, Pisiffik Royal Greenlandilu nerisassiassanik meeqqat peqqinnartunik igalerunik atugassaannik tamanik tunisinikkut, suliniummut tapersersuisuupput.
”Brugseni, KNI, Pisiffik Royal Greenlandilu tapersiinerannut nerisassiassanik aalisakkanillu meeqqat pitsaasunik peqqinnartunillu nerisassiarisinnaasaannik tunissuteqarnerannut qutsavigingaarusuppagut. Taamaalillutik suliffeqarfiit taakku meeqqat peqqisuunissaannut pisinnaatitaaffiinullu tunngatillugu akisussaaffimmik annertuumik takutitsipput,” Paarisami immikkoortortami pisortaq, Helena Lynge Møller erseqqissaavoq.
IGASA pillugu paasissutissat
IGASA suliniutaavoq aaqqissuussaanikkut ”Inuuneritta III –ip 2020-imiit 2030-imut Naalakkersuisut meeqqat inuunerinnerulernissaat pillugu suleqatigiinnissaq siunertaralugu periusissiap” ataani inissisimasoq. IGASA-mi nuna tamakkerlugu meeqqat atuarfianni atuartut akulliit suleqatigiissuteqartinneqarneranni nerisassiorneq, peqqinneq, ataatsimoorneq meeqqallu pisinnaatitaaffii ukkanneqartarput.
