Quppersakkat nutaat saqqummerput: Ajornartoornermi siunnersuutit

Quppersakkat nutaat Kalaallit Nunaanni ajornartoortoqartillugu ilaqutariinnik aamma najukkani inuiaqatigiinnik nukkassaataasumik ikorfartuissapput

Peqatigiiffik Folk & Sikkerhed (kalaallisut inuit isumannaallisaanerlu) aamma UNICEF Kalaallit Nunaanni maannakkut quppersakkanik paasissutissiisunik marlunnik saqqummersitsipput, taakkua Kalaallit Nunaanni ilaqutariinnik, meeqqanik aamma najukkani inuiaqatigiinnik ajornartoornernik aamma pisunik siumut takorloorsimanngisanik nalaataqarnermi nukkassaataasumik ikorfartuissapput. Quppersakkat nuna tamakkerlugu agguaanneqassapput inersimasunut aamma ilaqutariinnut meerartalinnut sammisuullutik.

Quppersakkat marluk “Pisoqarpammi?” aamma “Ajornartoornermi qitornat imatut ikorfartussavat” tigussaasunik siunnersuipput, tassa qanoq ajornartoornernut piareersarsinnaaneq pillugu, piviusumik aamma tarnikkut kiisalu inersimasutut piffissani qularfiusuni meeqqanik qanoq pitsaanerpaamik tapersersuisinnaanermik.

“Kalaallit Nunaat soorlu nunarsuup sinnerani aamma taamaattoq ajornartoorsinnaanernik arlalinnik nalaataqarsinnaavoq – silapilussuarmiit aamma pilersuinerup unittoorneranut nunarsuaq tamakkerlugu aaqqiagiinnginnernut aamma eqqunngitsunik paasissutissiisarnernut. Quppersakkat taakkua aqqutigalugit kissaatigaarput innuttaasut ilisimasaat aamma iliuuseqarsinnaanerat pitsanngorsarusupparput, taamaalillutik amerlanerusut piareersimanerusutut misiginiassammata sumilluunniit ilimaginngisamik pisoqaraluarpat” taamatut oqarpoq Kaj Kleist, Kalaallit Nunaanni Folk & Sundhed-imi siulittaasoq.

Quppersakkami “Pisoqarpammi?” qitiutinneqarpoq inuttut aamma ilaqutariittut upalungaarsimanissaq kiisalu ilaatigut peqqumaatissat, attaveqaqatigiinneq, ajornartoorneqarnerani akisussaassuseqarneq aamma nutaarsiassanik eqqunngitsunik akiuunneq pillugit siunnersuutigineqarlutik. Quppersagaq Kalaallit Nunaanni pissutsinut aamma inuunermut tulluarsagaavoq.

UNICEF Kalaallit Nunaanni quppersakkamut “Ajornartoornermi qitornat imatut ikorfartussavat” immikkut ilanngussaqarput, tassani ajornartoornermi meeqqat atugarisaat qitiutinneqarlutik. Quppersakkami angajoqqaat aamma inuit allat paaqqinnittuusut sakkussaqartinneqarput sammisat artornartut pillugit meeqqanik oqaloqateqarnissamut, ulluinnarni toqqissisimanartumik pilersitsinissamut aamma meeqqat tarnimikkut peqqinnissaannik tapersersuinissamut.

“Meeqqat toqqissisimannginneq aamma allanngortoqarnera malugisarpaat – aammattaaq inersimasut illersuiniarlutik misiliineranni. Pisariaqarluinnarpoq inersimasut meeqqanik toqqissisimasumik aamma ukiuinut naleqquttumik oqaloqateqarnissaminnut ilisimasaqarnissaat aamma sakkussaqarnissaat, taamaalillutik meeqqat isumakuluuteqarnerminni kisimiittutut misigisimassanngimmata,” taamak oqarpoq Tina Dam UNICEF Kalaallit Nunaanni suliniummut pisortaasoq. 

Quppersakkat suliarineqarput paasiuminarnissaat qitiutillugu, piviusunik siunnersuuteqarput aamma ilaqutariit kalaallit aamma ataatsimoornerit ataqqillugit. Piaartumik Kalaallit Nunaat tamakkerlugu agguaanneqassapput kiisalu tamatuma saniatigut nittartakkakkut takuneqarsinnaapput uani www.unicef.gl.

Saqqummersitsineq Folk & Sikkerhed aamma UNICEF Kalaallit Nunaanni suleqatigiissutigaat qaammarsaaneq, toqqissisimaneq aamma meeqqat pisinnaatitaaffii pitsanngorsarniarlugit piffissap annertunerusumik qularfiusup nalaani.

Paasissutissat sukumiinerusut pillugit attaveqarfigiuk:
Tina Dam
Suliniummut pisortaq
UNICEF Kalaallit Nunaanni
+299 27 35 52
tdam@unicef.dk

Torben Ørting Jørgensen

Danmarkimi Folk & Sikkerhed-imi siulittaasoq

+45 23 61 86 50

tj@folkogsikkerhed.dk