Meeqqat ataatsimeersuarneranni meeqqat politikerillu najukkami avatangiisit peqqinnartut pillugit oqallipput
Sapaatit akunnerata naanerani meeqqat inuusuttuaqqallu Kalaallit Nunaanni tamaneersut Meeqqat Ataatsimeersuarnerat 2025 peqataaffigaat, taanna Kalaallit Nunaanni UNICEF-ip pilersaarut NAKUUSA aqqutigalugu aaqqissussaaraat.
Ukioq manna sammineqartoq tassaavoq “Najukkami avatangiisit peqqinnartut”, FN-ip meeqqat pillugit isumaqatigiissutaat aallaavigalugu sammisaq meeqqat oqaluuseraat. Sammisaq ajunngilluinnartumik periarfissaqartitsisinnaavoq, kisianni aammattaaq ilaatigut ajornartut meeqqat ulluinnarni naammattoortagaat oqaluuserinissaannut periarfissaqarpoq. Ilaatigut meeqqat oqaluuseraat atuarnermi aamma sunngiffimmi inuuneqarnissaq, toqqissisimanartunik aamma ineriartorfiusunik avatangiiseqarnissaq, aamma aarlerinaateqarsinnaasunut illersorneqarnissaq, tamakkua toqqissisimasumik meeraanissamut unamminartuummata.
Meeqqat Ataatsimeersuarnerat nuannivataartarpoq taavalu ataatsimiigiaraangatta ataatsimoorrattarluta, kammattaartorluta taavalu misigisimanartuaannarluni tusaaneqarluta, paasineqarluta, Tullerunnaq Andreassen Sisimiuneersoq oqaluttuarpoq.
Meeqqat suliaqarnerisa saniatigut naalakkersuisut, inatsisartunut ilaasortat aamma borgmesterit peqataapput politikerit suliaqaatigalutik oqallinneranni (workshop), tassa aammattaaq periarfissaqarput sammisap oqaluuserinissaanut, meeqqanik peqataatitsisarneq tusassallugu naggataatigullu meeqqat apeqqutissaminnik piareersaareersimasut naapissallugit. Taamatuttaaq namminneq meeqqat aperisinnaallugit.
Meeqqanik naapitsineq politikerinut assut misigisaqartitsivoq, kissaatigaallu aappaagumut sivisunerusumik piffissaqarnissartik.
Meeqqat Ataatsimeersuarnerat peqataaffigalugu assut pissarsiaqarnarpoq aamma neriuummik tunisersuaarpoq uannut. Uagut suliatsinni meeqqat tusaarpiarneq ajoratsigit taamaammat Nakuusa Meeqqat Isummersorfia uanga pingaartittorujussuuvara tusaanissaa taavalu meeqqat nammineq suut pingaartinneraat tusaanissaat pingaaruteqartittorujussuuvara taamaammat qujanartumik Nakuusa taamatut periarfissiimmat, Nivi Rosing, oqarpoq IA sinnerlugu Inatsisartuni ilaasortaq.
Piffissami aggersumi UNICEF Kalaallit Nunaanni meeqqat inassuteqaataat katersussavaat aamma politikerinut saqqummiutissallugit, tunniussineq novembari ulluisa 18-ianni ingerlanneqassaaq.
Kalaallit Nunaanni UNICEF-ip Meeqqat Isummersorfii, inuit attaveqaataasut, MIO, Red Barnet aamma 15. juni Fonden qutsavigingaarpai, taakkua tapersersuinngippata ukioq manna ataatsimeersuarnermut meeqqat inuusuttuaqqallu Kalaallit Nunaanni tamaneersut katersortinneqarsimasinnaanngikkaluarput.
