Meeqqat aamma inuusuttut najukkami avatangiisit toqqissisimanartut peqqiffiussullu avatangiisererusuppaat
Marlunngornermi novembarip ulluisa 18-ianni NAKUUSA-p meeqqanut siunnersuisuisa, Meeqqat Isummersorfiisa, najukkami avatangiisit toqqissisimanartut peqqiffiussullu pillugit innersuussutitik nunatsinni politikeriinut tunniuppaat.
Meeqqat Isummersorfiini inuusuttut ilaasortat ukioq manna toqqarpaat Kalaallit Nunaanni meeqqat aamma inuusuttut tamarmik qanoq iliorluni toqqissisimanartunik, torersunik aamma ataatsimoornissamik, timersortarnissamik aamma nutaaliorsinnaanermik periarfissagissaartunik najukkami avatangiiseqarnissaat. Aalajangersakkat NAKUUSA-p Meeqqanik Ataatsimeersuartitsinerani oktobarimi oqaasertalerneqarpoq, tassani Kalaallit Nunaanni tamaneersut inuusuttut katersuunnerminni qulequtaq tamanna toqqagartik oqallisigimmassuk.
”Imigassamik aalakoornartortalimmik ersarissumik atuineq meeqqanut toqqisisimananngitsumik pilersitsisarpoq – inuillu akornananni saneqquaffianilu aamma orniginanngitsumik toqqissisimananngitsumillu aalakoortunit pissusilersorfiusarnera uagut meeraasugut avatangiiserissallugu toqqisisimananngitsuusoq oqariartuutigerusupparput!.,” Lykke, 15-inik ukiulik, oqarpoq, tunniussinermi meeqqat sinnerlugit oqalugiarnermini.
Aalajangersakkani tikkuartorneqarput meeqqat aamma inuusuttut toqqissisimanissaminnut aamma iluarisimaarinninnissaminnut unamminartorsiortarnerat, meeqqat isumaqarput politikerit tamakku ilungersuutigissagaat, taakkununnga ilanngullugit sunngiffimmi klubbit aserfallassimaqisut, imigassamik aalakoornartortalimmik atornerluinerup kinguneranik toqqissisimannginneq aamma ataatsimut isigalugu tusaaneqarnissaq aalajangiinernilu peqataatinneqartarnissaq, meeqqat aamma inuusuttut pineqartillugit.
”Meeqqat tamatta assigiinngilagut – ilaqarpugullu aamma immikkut pisariaqartitsisunik. Meeqqat immikkut pisariaqartitsisut aamma toqqissisimanerusumik atugaqassappata, pisariaqartipparput aaliangersagaq ullumikkut tunniunneqartoq oqartussanut – pimoorussamik politikkeriniillu aallunneqarumaartoq.Nunatsinnimmi meeqqat tamarmik pisinnaatitaaffigaat toqqissisimasumik avatangiiseqassallutik.” Lykke nangippoq.
Tina Damip, Kalaallit Nunaanni UNICEF-imi suliniutinut pisortap, erseqqissarpaa meeqqat oqariartuutaata pingaaruteqartuunera:
”Uani pineqartoq tassaavoq meeqqanut ilorrisimaarnatumik najukkami inuiaqatigeeqarnissaa, toqqissisimanartitaminnik aamma sunngiffimmi inuuneqarnissamut periarfissagissaartitsisunik, meeqqat ineriartorfigisinnaasaannik namminnerlu piginnaasaqarlualerfigisinnaasaannik. Meeqqat ilumoorput oqaramik toqqissisimaneq aamma ataatsimoorneq imminnut ataqatigiilluinnarneraramikkit, namminneq sumiiffissani pitsaasuniissinnaanerminnut pisinnaatitaallutik, aamma inersimasut akisussaasuunissaat avatangiisinik torersunik isumannanngitsunillu pilersitsinissaminnut. Meeqqat tusaaneqaraangamik ilaatinneqarlutillu tamanna inuiaqatigiinnut pitsaasumik sunniuteqartarpoq,” Tina Dam oqarpoq.
NAKUUSA tassaavoq Naalakkersuisut aamma UNICEF-ip suleqatigiiffiat, Kalaallit Nunaanni meeqqanik aamma inuusuttunik inuiaqatigiinni tusaaneqarnerulersitsinissamik suliaqartoq.
Meeqqat Isummersorfiisa aalajangersagaat 2025 naggaserlugu nunatsinni politikerinut erseqqissumik kajumissaaruteqartoqarpoq:
“Kissaatigaarput uagut ilissinnit tusaaneqarnissarput. Uagut tassaavugut siunissaq, ataatsimoorlutalu meeqqanut tamanut inuiaqatigiit pitsaanerusut aamma toqqissisimanarnerusut pilersissinnaavagut.”
