Meeqqat
Isummersorfii
Meeqqat nipaat – sunniuteqarnissamut aqqut
Meeqqat Isummersorfii meeqqat peqataatinneqarnerulernissaannut NAKUUSA-p suliniutaasa ilagaat. NAKUUSA katillugit arfineq-marlunnik Meeqqat Isummersorfiinik nuna tamakkerlugu peqarpoq. Meeqqat Isummersorfiini tamani ilaasortat piumassuseqarluartut 13-init 17-inut ukiullit kommuninit tamaneersut 5-10-t akornanni amerlassuseqarput, ataatsimoorlutillu isumaliutersuutiminnik isumassarsiaminnillu saqqummiussisarlutik.
Kommunini sunniuteqarsinnaaneq aalajangeeqataasinnaanerlu
Meeqqat Isummersorfii meeqqat inuusuttullu sunniuteqarnerulernissaat anguniarlugu suliniuteqartarput, tamannalu meeqqat pisinnaatitaaffiinik atugarissaarnerinillu najukkani nunamilu siuarsaanissamut pingaaruteqarpoq. Meeqqat inuiaqatigiinni oqaaseqarsinnaalernissaat anguniarlugu suliniuteqarnermi ilaasortat qitiusumik inissisimaffeqarput, taamaalillutik meeqqat isumaat pisariaqartitaallu tusaaneqartarlutillu ataqqineqartarput.
Meeqqat Isummersorfiini ilaasortat NAKUUSA-p ataani meeqqat inuusuttullu sinnerlugit inuiaqatigiinni sinniisussatut qinerneqartarput. Meeqqat sinnerlugit oqaaseqartartuunertik pingaarnertut suliassaraat, tassa meeqqat isumaat, pisariaqartitaat kissaataallu najukkami nunamilu tamarmi aalajangiinerni suliniutinilu assigiinngitsuni saqqummiussisartuupput.
Politikkikkut sunniuteqarneq
Meeqqat Isummersorfiisa politikkikkut sunniuteqarnerulernissaat qulakkeerniarlugu NAKUUSA suliniuteqarluarpoq. Suliniutinut politikkikkullu suliassanut attuumassuteqartunut taakkua isummersornissaat peqataanissaallu pisariaqartinneqaraangat inuusuttut katersornerisigut tamanna pisarpoq. Assersuutigalugu ilaasortat najukkami kommunini qinikkat Naalakkersuisullu siunnersorsinnaavaat, taamaalillutik aalajangiisoqassatillugu isumaasa pisariaqartitaasalu eqqarsaatigineqartarnissaat qulakkeertarpaat.
Aammattaaq Meeqqat Isummersorfii NAKUUSA-p ukiumoortumik Meeqqanik ataatsimeersuartitsinerinut katersuuttarput, tassanilu meeqqat inuusuttullu inuunerisa pitsaassusiannut pingaarutillit, soorlu peqqissutsimut, ilinniartitaanermut isumaginninnermullu tunngasut oqallisigisarlugillu sammisarpaat.
Meeqqat ataatsimeersuarnerat
Ilaarusuppit?
